Letras Trankadu

Letras Trankadu

ka nhos pegan nen ka nhos tadxan
ka nhos ladra y nen ka nhos obrigan
vivi kel ki nhos atxa o kel ki nhos ta pensa
nxinti tristi y marguradu
kantu nda konta ma nka sta livri

nmanxi sedu ta pensa na surupu-n'apu
kantu n'odja nhu Dxon di bariga xeio ta luta
dxuntu ku kes ki tinha fomi e kumi
si mudxer kumi, si fidxu kumi e xagua baldi.
dipos, di manda pa manda e kre manda

dxan manga, dxan ramanga ti kutubelo
uátxi-papalatxi, si bu masan kontu ta ten
nsta un boi disaforradu pa os lampion
basalisku, bandofadu - korpu-l piodxu
ki mama mai eradu y bebi agua sedu

nbota, es sina na papel
nka sabia ma bixeru bai horta
sta maradu la kaza di Salgadu
so papa ta paga, so papa ta tral di la
ta trasel pa kasa, ta dal mama

diaxi nho! tantu rebolisu pa nada!
ni zezinhu xintadu na poial ta ozerba
nhu Dxon ta pripara taxu pa si fidxu
dxentis ka sabi me pes parti dipos
nkuantu tera ta seka y limarias ta mori

des bes nta nbera, nta pupa rixu!
nta ronka sima mar ta pidi txuba
nes margura di sabi ma nka sta livri
ma nteni no séku na piskos y korda kurtu
mesmu asi ka nhos pegan nen ka nhos tadxan!

oslimarias